≡ VOLUNTÀRIOS pro su SARDU ≡

LIBRERIA '900 aderit a «in SARDU»

RED — 2023-04-10T18:55:31Z

IN CUSTU LOGU... IN SARDU cun ROFOELLE

In custu butega de libros sardos e nono, ti podet atèndere in sardu su libraju ROFOELLE.
Duncas, non timas a faeddare in sardu cun issu de libros e de editores, ca t'at a rispòndere in sa matessi limba sena perunu problema!

Pagina FACEBOOK de LIBRERIA '900

LA GHIGLIOTTINA aderit a «IN SARDU»

RED — 2023-03-09T20:11:28Z

IN CUSTU LOGU... IN SARDU cun GIOVANNI

In custu salone modernu e dinàmicu, ti podet atèndere in sardu su propietàriu GIIOVANNI MANCA; e finas PIETRO
Duncas, non timas a faeddare in sardu cun issos, cando ti nche sunt seghende o acontzende sos pilos e sa barba, ca t'ant a rispòndere sena perunu problema!

e PIETRO

Pagina FACEBOOK de LA GHIGLIOTTINA

ARTVISTA aderit a «IN SARDU»

RED — 2023-03-06T11:08:13Z

IN CUSTU LOGU... IN SARDU cun GIANNI

In custu laboratòriu e butega de òtica, ti podet atèndere in sardu su propietàriu GIANNI PISANU.
Duncas, non timas a faeddare in sardu cun issu de òtica e de optometria, ca t'at a rispòndere sena perunu problema!

Pagina FACEBOOK de ARTVISTA

EFFEGI INFORMATICA aderit a «IN SARDU»

RED — 2023-02-10T07:58:10Z

IN CUSTU LOGU... IN SARDU cun ZOSEPE

In custu laboratòriu e butega de informàtica, ti podet atèndere in sardu su propietàriu ZOSEPE FADDA.
Duncas, non timas a faeddare in sardu cun issu de informàtica e de tècnica, ca t'at a rispòndere sena perunu problema!

Pagina FACEBOOK de EFFEGI Informatica

IN SARDU... IN CUSTU LOGU

RED — 2023-02-10T07:24:01Z

PRO ISPAINARE SU SARDU IN SA SOTZIEDADE E IN SU TERRITÒRIU

B'at unas cantas maneras de ispainare s'impreu de su sardu, finas in foras de sa famìlia, chi est su primu logu in ue imparamus, a su sòlitu, sa limba nostra!

Ma si bolimus chi su sardu non siat petzi limba de famìlia e de sentimentu, lu devimus impreare in cale si siat LOGU e OCASIONE.

Pro custu, semus proponende custa campagna de aformtimentu pro sa presèntzia de su sardu, , semper e in totue, cun atziones de sos voluntàrios pro su sardu, chi podimus èssere totus: chie lu faeddat e chie lu bolet imparare, in cale si siat logu e traballu, in sa sotziedade e in su territòriu.
Atziones chi non costant dinare ma petzi sa voluntade de cadaunu de afortire su sardu o de torrare a su sardu!

S'ùnica cunditzione de chi proponimus a chie aderit a sa campagna est de espònnere in ghenna de s'ufìtziu, butega, ente, s'adesivu:

e, in intro, in palas o in supra de su bancu, mesa, su cartellu cun su/ nùmene/s de sas pessones chi podent atèndere su cliente IN SARDU:

In custa manera, amus a dare un'agiudu pro su SARDU UFITZIALE, oe e cras.

“VOLUNTÀRIOS PRO SU SARDU”

RED — 2022-11-30T11:30:00Z

Custu situ est redatadu dae amigos voluntàrios de su sardu, duncas dae VOLUNTÀRIOS PRO SU SARDU, chi ponent a disponimentu parte de su tempus issoro chi lis sobrat dae su traballu in famìlia, in ufìtziu o in àteros logos, pro lu pònnere a disponimentu de su presente e venidore de sa limba nostra, su sardu.

Nen prus e nen mancu de su chi faghent in àteras comunidades natzionales cun limba pròpia, comente est sa Sardigna. De su restu, in perunu logu diant èssere resessidos mai a isvilupare sa cussèntzia pro sa liberatzione linguìstica e natzionale si non b'esserent istadas sas ideas e sas atziones de sos voluntàrios, in cale si siat livellu e logu de sa sotziedade.

Si non b'esseret istada —e non b'esseret galu s'òpera de sos voluntàrios chi gastant tempus e dinare issoro—, in perunu logu dìamus bìdere sa renàschida e isvilupu de sas limbas no ufitziales.

Sa funtzione de su voluntariadu est de seguru unu mèdiu de importu mannu pro ghetare passos mannos in su caminu de su sardu, comente l'est su voluntariadu in contu de sotziedade, salude, cultura, etc.

Est gràtzias a s'impinnu de sos voluntàrios chi amus otentu leges, iscolas, mèdios pro isvilupare sas limbas nostra, in Sardigna e in Itàlia/Europa. Contra a sos poderes polìticos e guvernativos chi minispretziaiant sa gherra nostra e nos trataiant comente arretrados e cunservadores de unu mundu pèrdidu. Est beru chi, si no operamus cada die pro cambiare sas cunchistas formales/legales in pràtica cuncreta chi nos garantat s'ufitzialidade pro como e pro cras, su perìgulu de "nos pèrdere" b'est semper. Ca nudda est balangiadu pro semper si non sighimus a operare, a controllare sas atziones de su guvernu sardu e istatale e a pretèndere de torrare a "su connotu" de sa limba nostra, cando (finas a unos 50 annos a como) totus faeddaiant in sardu.

Si su sardu sighit a èssere sa limba de su 10% de sos pitzinnos e non torramus a su 100%, semus pèrdidos e est pèrdida sa natzione sarda. Si su sardu no at a èssere sa limba de sa sotziedade e de su territòriu, sa limba de iscola, informatzione, sanidade, economia, religione, etc., semus pèrdidos e est pèrdida sa natzione sarda.

Tocat a gherrare semper pro nos afortire comente limba e natzione. Ca si no l'amus a fàghere nois —e como— no l'at a fàghere nemos in parte nostra. Prus isetamus e peus at a èssere.

Duncas, in prus de su chi podent fàghere pro sa limba nostra sos Entes prepostos, "Voluntàrios pro su Sardu" bolet dare un'agiudu modestu ma craru e determinadu —e sena peruna finalidade lucrativa— cun atziones de profetu ma chi non tenent bisòngiu de dinare meda o nudda. A bias bastat a fàghere finas in sardu su chi faghimus a su sòlitu in italianu, agiunghende su sardu in cartellos, adesivos, avisoa, regulamentos, documentos, etc.. O faghende lu petzi in sardu, a sa sola o in costàgiu de s'italianu si b'at bisòngiu.

"Voluntàrios pro su Sardu" podet agiuare a fàghere custu e àteru, e finas a praticare in modalidades modernas su sardu cun chie lu bolet imparare e praticare. Duncas, podet agiuare a lu faeddare, a lu lèghere e a l'iscrìere, a distàntzia o in presèntzia, cun adòvios virtuales o personales. Duncas, podet praticare atziones pro ispainare sa limba in sa sotziedade e in su territòriu, cun s'agiudu de àteros voluntàrios.

Tando, pro prima cosa, est de importu a iscrìere noas in custu situ o a nos dare sas informatziones giustas, dae Sardigna e dae aterue. A pustis, amus a regòllere e propònnere àteras atziones de profetu.

No est unu bisu ma una possibilidade, ca, sena de nois, su "Podere" at a fàghere pagu o nudda, finas si gastat muntones de dinare!

"Voluntàrios pro su Sardu" non leat dinare si non dae sos voluntàrios etotu e dae sos amigos, cando su dinare podet bisongiare pro pagare mèdios pro pònnere in òpera e ispainare sas atziones propostas. Pro èssere lìberos in sas ideas e in sas pràticas!

AMIGOS de VxS

VxS est unu grupu informale de amigos (pessones o entes) chi nd'agiuant s'atzione ponende a disponimentu materiales, documentos o dinare.

MATERIALES e DOCUMENTOS
Unu de sos mèdios de s'atividade de VxS sunt sos adesivos, volantinos, manifestos, etc., de sas campagnas pro afortire sa cussèntzia e sa sensibilidade in prode de su sardu. Su dinare pro los imprentare at a èssere cuveradu cun campagnas de finantziamentu, cun donos de sos amigos, etc.

ATZIONES DE VOLUNTÀRIOS PRO SU SARDU

Die cun Die … DAE SARDIGNA E DAE ATERUE
[NOAS, EVENTOS, INTERVISTAS, PESSONÀGIOS, PÀRRERES].